سەرۆک وەزیران: یەکخستنی هێزەکانی پێشمەرگە بڕیاری ئەمنی و سەربازی بەهێزتر دەکات

نوسینگەی رۆژنامەوانی سەرۆکوەزیرانی عیراق

عەلی زەیدی سەرۆک وەزیرانی عیراق

سەرۆک وەزیرانی عیراق رایدەگەیەنێت: یەکخستنی هێزەکانی پێشمەرگە، یەکڕیزیی بڕیاری ئەمنی و سەربازی بەهێزتر دەکات.

نووسینگەی ڕاگەیاندنی سەرۆک وەزیران ڕایگەیاند، ئێوارەی ئەمڕۆ پێنجشەممە سەرۆک وەزیرانی عیراق سەرپەرشتیی "کۆنفرانسی رۆژی سەروەری" کردوو، بە ئامادەبوونی هەیبەت حەلبووسی سەرۆکی ئەنجومەنی نوێنەران و و ژمارەیەک لە بەرپرسان، سەرکردەی هێزە سیاسییەکان، نوێنەری نێردە دیپلۆماسییەکان و کەسایەتییە کۆمەڵایەتییەکان، هاوکات لە وتارێکدا عەلی زەیدی سەرۆک وەزیرانی عیراق رایگەیاند: ئەمڕۆ هەوڵ و کۆششەکانی گەلی عیراق بە دەستکەوتێک دەگاتە ئەنجام کە شایستەی عیراق و سەروەرییەکەیەتی و بەرهەمی ئارامگری و کارکردنی بەردەوام دەدورێتەوە، وڵاتەکەمان بە بەرەکەتی خوێنی شەهیدەکانی توانیویەتی یەکێک لە گەورەترین جەنگەکانی مێژووی هاوچەرخ تێپەڕێنێت و پایەکانی سەروەریی خۆی بەسەر خاک و ئاسمان و ئاوە هەرێمییەکانیدا تەواو بکات.

راشیگەیاند:عیراق دەوڵەتێکە بنەماکانی سەروەریی سیاسی، ئابووری و ئەمنیی تێدا جێگیر دەبێت، دەسەڵاتی یاسا بەسەر سەرانسەری خاکەکەیدا باڵادەست دەبێت و سامانەکانیشی بەپێی دەستوور لە دەستی خودی عیراقییەکاندا دەبێت، لە هەموو تاقیکردنەوە سەختەکاندا سەرکەوتوو بووین، تا گەیشتن بەم ساتەی ئێستا کە گەلەکەمان بڕیاری خۆی بۆ پاراستنی دەوڵەت و سیستەمەکەی نوێ دەکاتەوە و رێگە لەوانە دەگرێت، کە بەرژەوەندیی گشتی دەکەنە دەروازەیەک بۆ دەستکەوتە تایبەتییەکانی خۆیان.

سەرۆک وەزیرانی عیراق ئاماژەی بەوەش کرد، ئەو سەروەرییەی ئەمڕۆ عیراق بەدەستی هێناوەتەوە، لە چەندین ڕاستیی نیشتمانیی تەواوکراودا بەرجەستە دەبێت، کە بریتین لە:

یەکەم: کشانەوەی هێزە بیانییەکان و کۆتاییهاتنی تەواوەتیی ئەرکی هاوپەیمانیی نێودەوڵەتی لە عێراق.

دووەم: ڕێککەوتن لەسەر کشانەوەی هێزەکانی تورکیا و چەکدارانی پارتی کرێکارانی کوردستان (PKK)، و کۆتاییهێنان بە بوونی گرووپە چەکدارە بیانییەکان لەسەر خاکی عێراق.

سێیەم: یەکخستنی هێزەکانی پێشمەرگە، بە شێوازێک کە یەکڕیزیی بڕیاری ئەمنی و سەربازی بەهێز بکات.

چوارەم: کۆتاییهێنان بە بوونی هەر ئۆپۆزیسیۆنێکی چەکداری بیانی لەسەر خاکی عێراق، و ڕێگریکردن لەوەی عێراق بکرێتە پێگەیەک بۆ هێرشکردنە سەر وڵاتانی دراوسێ.

پێنجەم: کۆنترۆڵکردنی دۆسیەی چەک بەپێی دەستوور و یاسا، و بەگوێرەی ئەو خشتە کاتییەی کە ڕێککەوتنی لەسەر کراوە بۆ چارەسەرکردنی ڕەوشی گرووپەکان و تێکەڵکردنیان لە دامەزراوەکانی دەوڵەتدا.

شەشەم: دەستپێکردنی بنیاتنانی سیستەمێکی نیشتمانیی تۆکمەی بەرگریی ئاسمانی، بۆ بەهێزکردنی توانای عێراق لە پاراستنی ئاسمان و سەروەرییەکەی.

PUKMEDIA