پەیامی نزار ئامێدى بە بۆنەی رۆژی نیشتمانییەوە

نوسینگەى راگەیاندنى سەرۆک کۆمار

نزار ئامێدی سەرۆک کۆمارى عیراق

نزار ئامێدی سەرۆک کۆمارى عیراق لە بەیاننامەیەکدا رایگەیاند: بە بۆنەی رۆژی نیشتمانییەوە، گەرمترین پیرۆزبایی و جوانترین هیوامان ئاراستەی ڕۆڵەکانی گەلەکەمان دەکەین.

دەقى بەیاننامەکە:

بە بۆنەی ڕۆژی نیشتمانییەوە، گەرمترین پیرۆزبایی و جوانترین هیوامان ئاراستەی ڕۆڵەکانی گەلەکەمان دەکەین.

لە کاتێکدا وێستگەیەکی گرنگ لە مێژووی نیشتمانەکەمان بەبیر دەهێنینەوە، ئەو کاتەی عێراق لە ساڵی ١٩٣٢ بوو بە دەوڵەتێکی سەربەخۆ و ئەندام لە کۆمەڵەی نەتەوەکاندا.

لەم بۆنەیەدا، سەدەیەک لە مێژووی عێراق بەبیر دەهێنینەوە بە هەموو ئەو ڕووداو و وەرچەرخانانەی بەخۆیەوە بینیویەتی، هەروەها ئەو شەڕ و قەیران و ئاڵنگاری و نەهامەتییانەی کە گەلەکەمان پێیاندا تێپەڕیوە؛ سەرەڕای هەموو ئەوانەش، عێراقییەکان بە نیشتمانەکەیانەوە بەپەیوەستی مانەوە و توانییان بەسەر ناڕەحەتییەکاندا زاڵ بن و سەرلەنوێ هەستنەوە.

ئەمڕۆ بەرپرسیارێتیی ئێمە ئەوەیە کە لە ڕابردووەوە پەند و وانە وەربگرین و ئەو خاڵانەی کۆمان دەکەنەوە بەهێزتریان بکەین لە هەموو ئەو شتانەی لێکمان دابڕن، هەروەها بە گیانێکی نیشتمانیی هاوبەشەوە کار بکەین لە پێناو عێراقێکی ئارام و سەقامگیردا؛ دەوڵەتێک کە ژیانێکی شایستە و شکۆمەندانە، خزمەتگوزاریی باشتر و هەلی کاری ڕاستەقینە بۆ هاووڵاتییانی دابین بکات.

بنیاتنانی داهاتووی عێراق بەرپرسیارێتیی هەمووانە، ئەمەش پێویستی بە هاوکارییەکی دڵسۆزانە هەیە لە نێوان دامودەزگاکانی دەوڵەت، هێزە نیشتمانییەکان و کۆمەڵگەدا، لەگەڵ دانانی بەرژەوەندیی هاووڵاتی و داهاتووی نەوەکان لە سەرووی هەموو پێوەر و بایەخێکەوە.

لەم بۆنەیەدا یادی شەهیدانی نیشتمان و قوربانیدانەکانیان بەرز رادەگرین و جەخت دەکەینەوە کە لەبەردەمماندا کارێکی زۆر ماوە بیکەین و لە هەمان کاتدا دەرفەتی گەورەمان لەبەردەستدایە بۆ بنیاتنانی عێراقێکی بەهێزتر، سەقامگیرتر و گەشەسەندووتر.

هەموو ساڵێک عێراق و گەلەکەی لە خێر و خۆشیدا بن.

نزار ئامێدی
سەرۆک کۆمار

PUKMEDIA