دوو سەركردەی سەربازيی: پێشمەرگە بەتوانایەو مەترسی لەسەر هەرێم نییە

PUKMEDIA

پێشمەرگەی کوردستان

دوو سەركردەی سەربازیی دڵنیایی دەدەنە خەڵكی كوردستان و دەڵێن، توانای هێزەكانی پێشمەرگە زۆر بەرزەو كشانەوەی هێزەكانی ئەمریكا لەناوچەكە جێی نیگەرانی نییە، چونكە ئەوكاتەی جیهان دۆستی رژێم بوو، كورد بە بەسێ كڵاشینكۆف و حەوت پێشمەرگەوە دەستی بە خەبات كردو كوردستانی دەپاراست.

لە مەراسیمی پەردە لادان لەسەر پەیكەری پێشمەرگە، محەمەد حاجی مەحمود، سەرۆكی پارتی سۆسیال دیموكراتی كوردستان، لەوتارێكدا، رۆشنایی خستە سەر دۆخی سیاسی كوردستان و پێشهاتە ئەمنییەكان و رایگەیاند: بەر لەهاتنی هێزە بیانییەكان بۆ عیراق و كوردستان، ئیمە بە پشتیوانیی هێزی پێشمەرگەو چیاكانی كوردستان هەبووین و بەرگریمان لە خۆمان و خاكەكەمان كردووە.

راشیگەیاند: ئێستاش بەكشانەوەی ئەو هێزانە دەتوانین هەموو سەختی و دژوارییەك تێبپەڕێنین و خۆمان و كوردستان بپارێزین.

هەر لەمەراسیمەكەدا، جەمیل هەورامی، سەرۆكی كۆمەڵەی پێشمەرگە دێرینەكانی كوردستان، رایگەیاند: لەساڵانی حەفتاكاندا، كاتێك خەباتمان دەكرد ئەمریكاو  یەكێتی سۆڤیەت و هەموو وڵاتانی ئەوروپا دۆستی سەدام حسێن و رژێمی بەعس بوون، بەڵام ئێمە بە سێ كڵاشینكۆف و حەوت پێشمەرگەوە دەستمان بە خەبات و بەرگریی  لەكوردستان كرد، ئێستاش دەتوانین  بەرگریی لە وڵاتەكەمان بكەین.

دوێنێ 3ی 10ی 2026، لە نۆهەمین ساڵیادی كۆچی دوایی سەرۆك مام جەلال، لە سەرئەركی ئەنجومەنی باڵای كۆمەڵەی پێشمەرگە دێرینەكانی كوردستان، لە مەراسیمێكدا لە بەردەم پاركی هەواری شار لە سلێمانی پەردە لەسەر پەیكەری پێشمەرگە لادرا.

PUKMEDIA