‏شەپۆلێکی بارانبارین هەرێمی کوردستان دەگرێتەوە

ئاژانسەکان

دیمەنی هەورە بروسکە

شەپۆلێکی باران و هەورەبروسکە ناوچە جیاجیاکانی هەرێمی کوردستان دەگرێتەوە و شارەزایەکی کەشناسیش دەڵێت: شەپۆلەکە لە ئەمڕۆوە دەستپێدەکات و باران تا 25 ملیم دەبارێت، کاریگەریشی زیاتر لەسەر پارێزگای سلێمانی دەبێت.

‏ ‏سالار حاجی عەلی شارەزای بواری کەشناسی بە PUKMEDIA ی ڕاگەیاند: هاتنی ئەم شەپۆلە سەرچاوەکەی نزمەپاڵەپەستۆیەکی دەریای سپی ناوەڕاستە کە شێیەکی زۆر لە زەریای ئەتڵەسییەوە وەردەگرێت و بەسەر ئەفریقاوە تێدەپەڕێت، دواتر لەگەڵ نزمەپاڵەپەستۆیەکی لاوازی دەریای سوور و بارستە هەوایەکی ساردی جەمسەری تێکەڵ دەبێت، لە ڕۆژی 6ی10ی2026، هەموو ئەم هۆکارانە یەکدەگرن و ئاستی بارانبارین زۆر دەبێت.

وتیشی: ‏شەپۆلەکە لە ئەمڕۆ دووشەممە 5ی 10ی2026 دەستپێدەکات، سەرەتا لە ناوچە شاخاوییەکانی دهۆک و هەولێر، دواتر دەگاتە سلێمانی، هەڵەبجە و کەرکوک، کە کاریگەری زیاتر لە ڕۆژی سێشەممە 6ی مانگ دەبێت و ئاستی بارانبارین زۆر زیاتر دەبێت.

لە بارەی بەردەوامی ئەم شەپۆلەشەوە، سالار حاجی عەلی، ئاماژەی بەوە کرد: کاریگەری ئەم شەپۆلە تا 7ی مانگ بەردەوام دەبێت و لە 8ی مانگ کۆتایی دێت، ‏ئاسمان نیمچەهەور بۆ هەوری تەواو دەبێت و نمەباران و بارانی سووک لە باکور و ڕۆژهەڵاتی هەرێم هەیە.

وتیشی: کاریگەری باران لە سلێمانی و ئیدارەی سۆران و ناوچەکانی ڕۆژهەڵات زیاترە و هەندێک جار هەورەبروسکەش ڕوودەدات، کە بڕی باران مامناوەندە و لە ناوچە شاخاوییەکان ڕێژەکە زیاترە لە شارەکان و دەگاتە 10 بۆ 25 ملیمەتر.

PUKMEDIA