په‌یامێك له‌بنه‌ماڵه‌ی ساڵح موسلیم-ه‌وه‌ بۆ ساڵیادی كۆچی دوایی مام

PUKMEDIA

سەرۆک مام جەلال و سالح موسلیم

بنه‌ماڵه‌ی ساڵح موسلیم له‌ساڵیادی كۆچی دوایی سه‌رۆك مام جه‌لال دا په‌یامێك بڵاوده‌كه‌نه‌وه‌و به‌گرنگییه‌وه‌ باس له‌مێژووی پڕ خه‌باتی ده‌كات.

ده‌قی په‌یامه‌كه‌....

به‌ ڕ‌ێز و ڕ‌ێزلێنان و خۆشه‌ویستییه‌وه‌ یادی مام جه‌لال تاڵه‌بانی ده‌كه‌ینه‌وه‌، كه‌ یه‌كێك بوو له‌ كه‌سایه‌تییه‌ مێژوویی و كاریگه‌ره‌كانی سیاسیی كورد و له‌ ژیانی خۆیدا بۆ ماف و ئازادی و بوونی سیاسیی گه‌لی كورد خه‌باتی كرد.

مام جه‌لال ته‌نها ڕ‌ابه‌رێكی سیاسی نه‌بوو؛ به‌ڵكو كه‌سایه‌تییه‌كی كاریگه‌ر بوو له‌ مێژووی نوێی كوردستان، كه‌ له‌ قۆناغه‌ سه‌خت و پڕ‌ له‌ ئاڵۆزییه‌كاندا هه‌وڵی دا ده‌نگی گه‌لی كورد بگه‌یه‌نێت و په‌یوه‌ندی و هاوبه‌شیی نێوان به‌شه‌كانی كوردستان به‌هێز بكات.

له‌كاتی ئه‌وه‌ی شه‌ڕ‌ی داعش و هێزه‌ تیرۆریستییه‌كان به‌ قورساییه‌كی زۆر له‌ ناوچه‌كه‌دا به‌رده‌وام بوو، ڕ‌ۆژئاوا و كوردانی ڕ‌ۆژئاوا له‌ یه‌كێك له‌ سه‌ختترین قۆناغه‌كانی مێژووی خۆیان تێده‌په‌ڕ‌ین.

له‌و كاته‌دا، پشتیوانی سیاسی و هه‌ڵوێستی یه‌كێتیی نیشتمانیی كوردستان (ی.ن.ك) بۆ ڕ‌ۆژئاوا و كوردانی ئه‌و به‌شه‌، و هه‌وڵ بۆ به‌هێزكردنی هاوبه‌شی و په‌یوه‌ندییه‌ كوردستانییه‌كان، به‌شێك بوو له‌و هه‌ڵوێسته‌ی كه‌ له‌و قۆناغه‌دا گرنگیی تایبه‌تی هه‌بوو.

ئه‌و ڕ‌ۆژانه‌ نیشانیان دا كه‌ كاتێك مه‌ترسی له‌سه‌ر بوون و ناسنامه‌ی كورد هه‌بێت، سنووره‌ ده‌ستكرده‌كان نابێت ببنه‌ به‌ربه‌ست له‌به‌رده‌م هاوپشتیی نێوان كوردان. ڕ‌ۆژئاوا له‌و قۆناغه‌دا بوو به‌ هێمای خۆڕ‌اگریی گه‌لی كورد، و هه‌ر هه‌ڵوێستێكی پشتیوانانه‌ بۆ ڕ‌ۆژئاوا له‌و كاته‌دا، له‌ چوارچێوه‌ی مێژووی هاوبه‌شی كورداندا مانای تایبه‌تی هه‌بوو.

ئێمه‌ له‌ یادی مام جه‌لالدا، ته‌نها كه‌سایه‌تییه‌كی سیاسی نینه‌وه‌؛ به‌ڵكو مێژوویه‌ك له‌ خه‌بات و قوربانی و هه‌وڵی گه‌لی كورد بۆ ناسنامه‌، زمان، خاك و مافی سیاسیی خۆی ده‌خه‌ینه‌وه‌ پێش چاومان.
له‌سه‌ر یادی ئه‌و كه‌سایه‌تییه‌ مێژووییه‌، سه‌ره‌خۆشی و هاوخه‌میی خۆمان ئاراسته‌ی بنه‌ماڵه‌ و نزیكان و هاوڕ‌ێ و هه‌موو ئه‌و كه‌سانه‌ ده‌كه‌ین كه‌ یادی مام جه‌لالیان له‌ دڵدایه‌.
یادی مام جه‌لال تاڵه‌بانی به‌ ڕ‌ێز و شانازییه‌وه‌ زیندوو ده‌هێڵین.

ڕ‌ووحی شاد، یادی به‌رز و ناوی به‌ مێژووی گه‌لی كورده‌وه‌ زیندوو بێت.

بنه‌ماڵه‌ی ساڵح موسلیم

PUKMEDIA