تیرۆرستێكی داواكراوی داعش لە سلێمانی دەستگیركرا

راگەیاندنی بەڕێوەبەرایەتیی گشتیی دژەتیرۆر

تیرۆرستی داواكراو

پاش بەدواداچوون و كۆكردنەوەی زانیاریی وردی هەواڵگری، هێزەكانی بەڕێوەبەرایەتیی گشتیی دژەتیرۆر توانییان تیرۆرستێكی داواكراو دەستگیر بكەن.

بەڕێوەبەرایەتیی گشتیی دژەتیرۆر لە راگەیەنراوێكدا ئاماژەی بەوەكرد: تیرۆرستی دەستگیركراو ئەندامی بەناو رێكخراوی تیرۆرستیی داعش بووە و لە (فرقە 210)دا چالاكی كردووە. هەروەها باوكی لەڕیزەكانی داعشدا لە (ویلایەتی باكووری بەغدا) فەرماندەی مەفرەزەی سەربازی بووە، پاشان كراوەتە والی (فەللوجە).

راشیگەیاند: باوكی لە قەزای ئەبو غرێب لە ئەنجامی هێرشێكی ئاسمانیدا كوژراوە، هەروەها برایەكی لە ناوچەی نباعی لەلایەن هێزە ئەمنییەكانەوە كوژراوە.

ئەوەشی خستەڕوو: تیرۆرستی دەستگیركراو، پاش رووخانی داعش، رووی لە شاری سلێمانی كردووە و لەوێ نیشتەجێ بووە، لە هەمان كاتدا وەك ئەندامێكی چالاكی رێكخراوەكە لە سنووری سلێمانی بەردەوام بووە لە چالاكییەكانی تا ئەو كاتەی لەلایەن هێزەكانی دژەتیرۆرەوە دەستگیركرا.

PUKMEDIA