هێزەکانی حکومەتی یەمەن لە بابولمەندەب نزیک دەبنەوە

AFP

هێزەکانی حکومەتی یەمەن لە بابولمەندەب نزیک دەبنەوە

هێزەکانی حکومەتی یەمەن لە هەوڵێکیاندا بۆ وەرگرتنەوەی ئەو ناوچانەی ڕادەستی حوسییەکان کرابوون، دەستییان بەسەر چەندین پێگەی سەرەکیی سەر بە تەنگەی بابولمەندەبدا گرت.

 بەپێی ئەو سەرچاوە سەربازی و حکومییانەی بە ڕۆیتەرزیان راگەیاندووە، هێزەکانی حکومەت بە پاڵپشتی هاوپەیمانێتی و بەسەرکردایەتی سعودیە، بەشێکی گەورەی ناوچەی "زوباب"یان کۆنتڕۆڵ کردووە کە ڕوانینێکی ستراتیژی بەسەر تەنگەکەدا هەیە. لە بەرامبەردا، ڕاگەیاندنەکانی سەر بە حوسییەکان پێشڕەویی هێزەکانی حکومەتیان لەو ناوچەیەدا بە تەواوی ڕەتکردووەتەوە.

هاوكات، دوای ئەوەی شەڕی ناوخۆیی یەمەن بەهۆی ململانێ فراوانەکەی نێوان ئەمریکا و ئێران سەریهەڵدایەوە شەڕ و پێكدادان لە چەندین شوێنی جیاواز توندتر بووەوە، بەجۆرێک حوسییەکان جگە لە هەوڵەکانیان بۆ كۆنتڕۆڵكردنی بابولمەندەب و ئاڕاستەکردنی مووشەک و درۆن بۆ سەر شار و ژێرخانی سعودییە، لە سنووری پارێزگای تەعیزیش پێشڕەوییان کردووە، بەپێی چەند سەرچاوەیەکیش، ڕێگەی شاخاویی تەعیزیان گەمارۆ داوە، هەرچەندە سەرچاوەیەکی دیکەی حکومی داخرانی ڕێگەکەی ڕەتکردووەتەوە وەک وەڵامێک، حکومەتی دانیپێدانراوی نێودەوڵەتیی یەمەن دەستپێکردنی ئۆپراسیۆنێکی بەرفراوانی بۆ ئازادکردنەوەی ناوچەکان ڕاگەیاند.

لەلایەکی ترەوە، ئەمڕۆ 5ی10ی2026 مارکۆ ڕوبیۆ وەزیری دەرەوەی ئەمریکا لەلێدوانێکیدا بۆ رۆژنامەنووسان ڕایگەیاند: سعودیە مافی خۆیەتی بەرگری لە خۆی بکات، ئەمەش دوای هێرشەکانی تاقمی حوسییەکان کە هاوکاتە لەگەڵ دەستپێکردنی ئۆپەراسیۆنی بەیانی یەمەن و پێشڕەوییەکانی هێزە چەکدارەکانی یەمەن لە چەند بەرەیەکدا.

راشیگەیاند: هێزەکانی یەمەن هەوڵی کۆنترۆڵکردنەوەی ئەو خاکە دەدەن کە لە کاتی هێرشەکانیاندا لەلایەن حوسییەکانەوە دەستی بەسەردا گیراوە، ئاماژەی بەوەشکرد، ئەمە خاکێکە کە حوسییەکان لە ئەنجامی هێرشەکەیان دەستیان بەسەردا گرتووە و ئەوەی ئێستا ڕوودەدات وەڵامدانەوەیە بۆ ئەوە، ئێمە پێشبینیمان دەکرد ئەمە ڕووبدات و رووشیدا.

لای خۆشیەوە هاوپەیمانی بە سەرۆکایەتی سعودیە کە پاڵپشتی لە حکومەتی شەرعی دەکات، لەناوبردنی 324 ئامانجی بەنرخی لەدوای هەڵدانی "بەیانی یەمەن" ڕاگەیاند، ئەمە جگە لە دەستەبەرکردنی بەرگری ئاسمانی بۆ گەرووی باب ئەلمەندەب. 

PUKMEDIA