سلێمانی ئامادەکاری بۆ وەرزی باران بارین دەکات

تایبەت

ئامادەکارییەکان بۆ رووبەڕوبوونەوەی مەترسییەکانی لافاو

بەڕێوەبەری نووسینگەی جێگری سەرۆکی حکومەتی هەرێمی کوردستان، لەگەڵ بەرپرسانی سنووری شاری سلێمانی کۆبووەوە، بە مەبەستی ئامادەکارییەکان بۆ رووبەڕوبوونەوەی مەترسییەکانی لافاو.

ئەمڕۆ سێشەممە، 6ـی تشرینی یەکەمی 2026، کۆبوونەوەیەک بە سەرپەرشتی عەتا محەمەد، بەڕێوەبەری نووسینگەی قوباد تاڵەبانی، جێگری سەرۆکی حکومەتی هەرێمی کوردستان، و ئامادەبوونی پارێزگاری هەڵەبجە، جێگری پارێزگاری سلێمانی، سەرپەرشتیاری ئیدارە سەربەخۆکانی گەرمیان و راپەڕین، و سەرۆکی شارەوانییەکانی سلێمانی و هەڵەبجە و رانیە و کەلار، و بەڕێوەبەرە گشتییەکانی شارەوانییەکان و ئاوەدانکردنەوە و رێگەوبان، بەڕێوەبەری کەشناسیی سلێمانی و بەڕێوەبەری ئاودێری سلێمانی و گەرمیان بەڕێوەچوو.

کۆبوونەوەکە بە مەبەستی ئامادەکاریی بوو بۆ وەرزی بارانبارینی ئەمساڵ و رووبەڕووبوونەوەی ئەگەرەکانی دروستبوونی لافاو. هەر لە کۆبوونەوەکەدا باس لە دابینکردنی بودجە و پێداویستی بەڕێوەبەرایەتییەکان کرا بۆ رووبەڕووبوونەوەی مەترسییەکانی لافاو، پاککردنەوەی ئاوەڕۆکان و لابردنی زیادەڕۆییەکانی بەردەم رێڕەوەکانی ئاو.

PUKMEDIA