فراکسیۆنی یەکێتی داوای بەدواداچوون بۆ داربڕینەوەکەی بادینان دەکات

PUKMEDIA

لۆگۆی یەکێتیی نیشتمانیی کوردستان

سەرۆکی فراکسیۆنی یەکێتی داوا دەکات لیژنەیەکی بەدواداچوون لە هەردوو لیژنەی کشتوکاڵ و ئاسایش و بەرگری پێکبهێنرێت، بۆ ئاشکراکردنی راستییەکانی بڕینەوەی درەختەکانی سنووری پارێزگای دهۆک لەلایەن سوپا و کۆمپانیا تورکییەکانەوە.

هەرێم کەمال ئاغا سەرۆکی فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق، داوای کرد لیژنەیەکی بەدواداچوون لە هەردوو لیژنەی کشتوکاڵ و ئاسایش و بەرگری پێکبهێنرێت، بۆ ئاشکراکردنی راستییەکانی بڕینەوەی درەختەکانی سنووری پارێزگای دهۆک لەلایەن سوپا و کۆمپانیا تورکییەکانەوە.

لە داواکارییەکەیدا، سەرۆکی فراکسیۆنی یەکێتی جەختی کردەوە کە ئەم بەڕەفتارە مەترسیی جدیی لەسەر ژینگەی سروشتی، تەندروستیی هاووڵاتییان و ئاژەڵانی ناوچەکە دروستکردووە و بووەتە هۆی ناڕەزایەتییەکی بەربڵاو، ناوچەکە دەکەوێتە چوارچێوەی کەرتی فەرماندەیی هێزەکانی سنووری وەزارەتی ناوخۆی عیراق، بۆیە داوای کرد بەپشتبەستن بە ماددەی 33ی دەستووری عیراق و یاسای پاراستنی ژینگەی ژمارە 27ی ساڵی 2009، رێکاری بەپەلە بۆ پاراستنی ژینگەی بادینان بگرێتە بەر.

ئەم داوایەی فراکسیۆنی یەکێتی لە کاتێکدایە، بڵاوبوونەوەی گرتەی ڤیدیۆیی بارهەڵگرەکانی دار لە گوندەکانی ئامێدی و بەرواری باڵا کاردانەوەی بەرفراوانی لێکەوتووەتەوە، سەرەڕای ئەوەی پارێزگاری دهۆک رەتیکردبووەوە درەخت لە سنوورەکەیان بڕدرابێتەوە، بەڵام موختاری گوندی ئەرەدنێ و وێنەی مانگە دەستکردەکان بڕینەوەی بەردەوامی درەختەکان لەلایەن سوپا و بەڵێندەرانی تورکیاوە پشتڕاست دەکەنەوە.

PUKMEDIA