ئەنجومەنی نوێنەران سبەی دەنگ لەسەر تەواوکردنی کابینەی حکومەت دەدات

راگەیاندنى ئەنجومەنى نوێنەران

وێنەى کۆبوونەوەیەکى پێشترى ئەنجومەنى نوێنەران

ئەنجومەنی نوێنەرانى عیراق سبەینێ بۆ تەواوکردنی کابینەی حکومی کۆدەبێتەوە و ئەندامێکی فراكسیۆنی یەكێتیی نیشتمانیى کوردستان رایگەیاند: دوو پۆست پشکى کوردە.

بڕیارە سبەینێ پێنج شەممە  15ى10ى2026 ، ئەنجومەنی نوێنەرانى عیراق کۆبوونەوەی ژمارە 26 ئەنجام بدات، بە مەبەستی دەنگدان لەسەر تەواوکردنی کابینەی وەزاریی حکومەتی فیدراڵی.

ئاسۆس عەلی ئەندامى ئەنجومەنى نوێنەرانى عیراق لە فراکسیۆنى یەکێتیی نیشتمانیى کوردستان بە PUKMEDIA  ى راگەیاند: ئەنجومەن لە دانیشتنی سبەینێدا دەنگ لەسەر کاندیدەکانی پۆستی جێگری سەرۆکی حکومەت و کاندیدى پۆستە وەزارییە بەتاڵەکان و نوێیەکان دەدات.

روونیشی کردەوە: پێم وایە ئەنجومەنى نوێنەران لە دانیشتنى سبەینێدا دەنگ لەسەر کاندیدەکان دەدات ، کە لەناویاندا دوو پۆستی پشکى کوردە، کە بریتین لە "جێگری سەرۆک وەزیران و وەزیری ئاوەدانکردنەوە و نیشتەجێکردن".

ئەمەش لە كاتێکدایە کە عەلی زەیدى سەرۆکی ئەنجومەنی وەزیران، پێشنیاری کرد کە سبەینێ 15ی تشرینی یەکەمی 2026 وەکو وادەیەک بۆ بەڕێوەچوونی دانیشتنی ئەنجومەنی نوێنەران دیاری بکرێت، بە مەبەستی دەنگدان لەسەر کاندیدانی جێگری سەرۆکی ئەنجومەنی وەزیران و وەزارەتە بەتاڵ و نوێیەکان.

PUKMEDIA