دەستەی ئامار پڕۆژەی سەرژمێریی رەوەندی عیراقیی لە دەرەوە رادەگەیەنێت

iraq.shafaqna

وەزارەتى پلاندانان

وەزارەتی پلاندانانی عیراق، کاراکردنی بەستەری ئەلیکترۆنی بۆ پڕۆژەی "سەرژمێریی رەوەندی عیراقیی لە دەرەوە" راگەیاند و داوا لە تەواوی عیراقییەکانی نیشتەجێی هەندەران دەکات بۆ مەبەستی بەهێزکردنی پەیوەندییەکان و پشتگیریکردنی پلانەکانی دەوڵەت، لە رێگەی پلاتفۆرمی دیجیتاڵییەوە خۆیان تۆمار بکەن.

دەستەی ئامار و سیستەمی زانیاریی جوگرافی لە وەزارەتی پلاندانانى عیراق ئەمڕۆ چوار شەممە 14ى10ى2026 خستنەکاری بەستەرێکی ئەلکترۆنی بۆ پڕۆژەی "سەرژمێریی رەوەندی عیراقیی لە دەرەوە" راگەیاند .

لە بەیاننامەیەکدا روونی کردەوە: ئەم پڕۆژە نیشتمانییە لە چوارچێوەی گۆڕانی دیجیتاڵی گشتگیردا دێت کە لەلایەن دەستەکەوە سەرکردایەتی دەکرێت، بە مەبەستی دابینکردنی پێوەری ورد کە پشتگیریی پلانەکانی دەوڵەت و داڕشتنی سیاسەتە گشتییەکان دەکات و بەهێزکردنی پەیوەندییەکان لەگەڵ لێهاتوویی و ئەو عیراقییانەى کە لە هەندەرانن و دابینکردنی پشتیوانی و خزمەتگوزاریی گەشەپێدانەکان بۆیان.

هاوکات داواشى کرد، سەرجەم ئەندامانی کۆمەڵگەی عیراقی و خێزانە نیشتەجێبووەکانی دەرەوە و دامەزراوە و سەندیکا عیراقییەکان، بەشداریی کارا بکەن و پێشەنگ بن لە تۆمارکردنی زانیارییەکانیان لە رێگەی بەستەری راگەیەندراوەوە و جەختیشی کردەوە، نهێنی و تایبەتمەندیی زانیارییەکان بەپێی یاسا و رێنماییە ئامارییە پەسەندکراوەکان پارێزراون.

PUKMEDIA