سەرۆککۆمار: عیراق پشتگیری لە پرۆسەی ئاشتی بەردەوام لە تورکیا دەکات

نوسینگەی راگەیاندنی سەرۆکایەتی کۆمار

نزار ئامێدی سەرۆککۆمار و هاکان فیدان وەزیری دەرەوەی تورکیا

نزار ئامێدی سەرۆککۆماری عیراق ، ئەمڕۆ 17ی10ی2026 لەکۆشکی بەغداد، پێشوازیکرد لە هاکان فیدان وەزیری دەرەوەی تورکیا وەفدی یاوەری .

بەپێی راگەیەندراوێکی نوسینگەی راگەیاندنی سەرۆکایەتی کۆمار،لەمیانی دیدارەکەدا پەیوەندییە دووقۆڵییەکانی نێوان عیراق و تورکیا و چۆنیەتی بەرزکردنەوەی هاریکاری هاوبەشیان لە بوارە جیاجیاکاندا تاوتوێ کرد، بە شێوەیەک کە خزمەتی بەرژەوەندییە هاوبەشەکانی هەردوو وڵات و گەلی دۆست بکەن.

هەرلەدیدارەکەدا باس لەپێشهات و ئاڵنگارییەکانی کەڕووبەڕوی ناوچەکە دەبنەوە کرا، سەرۆککۆمار جەختی لە گرنگی بەردەوامی ڕاوێژ و هەماهەنگی هاوبەش و چڕکردنەوەی هەوڵەکان بە ئامانجی پشتگیریکردنی ئاشتی و سەقامگیری کردەوە.

هاوکات سەرۆککۆمار ئاماژەی بەوەدا کە بەڕێوەچونی 52هەمین دانیشتنی ئەنجومەنی وەزیرانی دەرەوەی وڵاتانی ئەندامی ڕێکخراوی هاریکاری ئیسلامی کە بەغداد میوانداریی دەکات، وێستگەیەکی گرنگە بۆ بەهێزکردنی کاری هاوبەش و تیشکیشی خستە سەر ئەو هەلومەرجەی کە ناوچەکە بەخۆیەوە دەبینێت، لەگەڵ گۆڕانکارییە خێرا و ئاڵنگارییە ئاڵۆزەکانی، گرنگییەکی تایبەت بە کۆنفرانسەکە دەبەخشێت، بەو پێیەی دەرفەتێک دەڕەخسێنێت بۆ گفتوگۆکردن لەمەڕ کاردانەوەی ئەو گۆڕانکارییانە و یەکخستنی هەوڵەکان بۆ چارەسەرکردنیان بە شێوەیەک کە بەرژەوەندی وڵاتان و گەلانی ناوچەکە بپارێزێت و ڕێگری لەپەرەسەندنی گرژی و قەیرانەکان بکات.

سەرۆککۆمار پشتیوانی عیراقی بۆ پرۆسەی ئاشتی بەردەوام لە تورکیا دووپاتکردەوە و جەختی لە گرنگی بەردەوامی هەوڵەکان کردەوە بۆ پتەوکردنی ئاشتی و سەقامگیری و گرتنەبەری دیالۆگ و لێکتێگەیشتن وەک ڕێگەیەک بۆ چارەسەرکردنی کێشە هەڵپەسێردراوەکان بەشێوەیەک کە یارمەتیدەر بێت بۆ بەهێزکردنی ئاسایش و سەقامگیری لە ناوچەکەدا.

لەلای خۆیەوە وەزیری دەرەوەی، جەختی لەپەرۆشی وڵاتەکەی کرد بۆ بەرزکردنەوەی پەیوەندییەکانی لەگەڵ عیراق بۆ ئاستێکی فراوانتر، ئاماژەی بە گرنگی چالاککردنی ڕۆڵی ڕێکخراوی هاریکاری ئیسلامی کرد لە ڕووبەڕووبوونەوەی ئەو ئاڵنگارییانەی کەڕووبەڕووی وڵاتانی ئەندام دەبنەوە، و چەسپاندنی بنەماکانی هاودەنگی لەنێوانیاندا.

PUKMEDIA