خۆپیشاندانەکانی ئەوروپا ئیتاڵیاشی گرتەوە

ئاژانسەکان

دیمەنێکی خۆپیشاندانەکان

خۆپیشاندان چەند وڵاتێکی ئەوروپای گرتۆتەوە، خۆپیشاندەران داوای ئاسایی کردنەوەی ژیان و باشکردنی بژێوی و چاکسازی لە کەرتەکانی پەروەردە و تەندروستی و وزە دەکەن، لەو چوارچێوەیەشدا لە دوو رۆژی رابردوودا خۆپیشاندانی فراوان لە فەرەنسا و ئیتاڵیا دەستیپێکردووە.

دوای فەرەنسا بەیانی ئەمڕۆ 18-10-2026 ژمارەیەک لە خوێندکاران و گەنجان و هاووڵاتیان لە ئیتاڵیا بۆ داواکردنی مافەکانیان و باشكردنی بژێوی ژیانی تاک لە وڵاتەکە خۆپیشاندانیان ئەنجامدا و گرژی لە نێوان خۆپیشاندەران و هێزە ئەمنییەکاندا دروستبوو، ئەمەش لەکاتێکدایە کەلە دوو رۆژی رابردوودا خۆپیشاندانی فراوان لەفەرەنسا ئەنجامدرا و لەو بارەیەشەوە ئیمانوێل ماکرۆن  سەرۆکی فەرەنسا رایگەیاند: هەموو تاکێک مافی خۆیەتی بەشێوەیەکی شارستانییانە داوای مافی خۆی بکات بەڵام دروستبوونی گرژی و ئاڵۆزی و تێکدانی باروودۆخەکە لە هیچ کەسێک قبوڵ ناکەین.

جەنگی ئەمریکا و ئێران و راگرتنی نەوتی خۆرهەڵاتی ناوەڕاست بۆ ئەوروپا لە گەرووی هورمزەوە کاریگەری نەرێنی کردووەتە سەر کەرتی وزە لە ئەوروپا بەگشتی و شۆفێران چەندین سەعات لە وێستگەکانی سوتەمەنی بۆ وەرگرتنی بەنزین دەوەستن، ئەمە جگە لەوەی کە خوێندکاران لە فەرەنسا و ئیتاڵیا نیگەرانن لە کەرتی پەروەردەی وڵاتەکەیان و داوای چاکسازی گشتی لەو کەرتە دەکەن.

هاوشانی خوێندکاران بەشێک لە هاووڵاتیانیش رژاونەتە سەر شەقامەکان و داوای چاککردنی کەرتی تەندروستی و باشکردنی بژێوی ژیانیان دەکەن.

خۆپیشاندانەکانی فەرەنسا و ئیتاڵیا سەرەتایەکی نوێیە بۆ ئەوروپا و چاوەڕوانی فراوانبونی زیاتری لێ دەکرێت، چونکە جەنگی ئێران و ئەمریکا بە گشتی کاریگەری کردوەتە سەر باروودۆخی ئابووری ئەوروپا، کە چاودێرانی سیاسی بە سەرهەڵدانێکی جەماوەری نوێ لێی دەڕوانن. 

PUKMEDIA