12 کۆچبەری دیکە لە ئیجەدا خنکان

ئاژانسەکان

بەلەمێکی کۆچبەران

بە پێی ڕاپۆرتە میدیاییەکان  بەرەبەیانی ئەمڕۆ دووشەممە 19ی تشرینی یەکەم، بەهۆی ژێر ئاوکەوتنی دوو بەلەمی جیاوازی کۆچبەران لە دەریای ئیجەدا لە نزیک دوورگەکانی سامۆس و لێسبۆسی یۆنان، 12 کۆچبەر گیانیان لە دەست دا.

لە ڕووداوی یەکەمدا لە نزیک دوورگەی سامۆس، بەهۆی هەڵگەڕانەوەی بەلەمێک کە کۆچبەرانی هەڵگرتبوو لە دووری 3.7 میل لە باکووری دوورگەکە، 6 کەس گیانیان لە دەست دا.

پاسەوانی کەناراوەکانی یۆنان توانییان 14 کەس ڕزگار بکەن و سێ لە ڕزگاربووەکانیش بۆ وەرگرتنی چارەسەر گەیەندرانە نەخۆشخانەی گشتی سامۆس، لە کاتێکدا پڕۆسەی گەڕان و پشکنین بەردەوام بوو.

لە ڕووداوێکی تری جیادا لە نزیک دوورگەی لێسبۆس، 6 کۆچبەری تر کە یەکێکیان کۆرپەیەکی ساوا بوو، گیانیان لە دەست دا؛ ئەوەش دوای ئەوەی بەلەمێک کە لە تورکیاوە هاتبوو پێکدادانی لەگەڵ کەشتییەکی پشکنینی کەناراوەکانی یۆنان کردوو بەلەمەکە هەڵگەڕایەوە، کەلەم ڕووداوەدا 8 کەس ڕزگار کران و ڕەوانەی نەخۆشخانە کران.

دەسەڵاتدارانی یۆنان هاووڵاتییەکی تەمەن 37 ساڵەی تورکیان دەستگیر کردووە کە گومان دەکرێت شۆفێری یەکێک لە بەلەمەکان بێت و تێوەگلابێت لە کاری قاچاخچێتیکردنی مرۆڤ.

PUKMEDIA