قوباد تاڵەبانی لەگەڵ راوێژکاری ئاسایشی نیشتمانیی بەریتانیا کۆبووەوە

نوسینگەی رۆژنامەوانی قوباد تاڵەبانی

قوباد تاڵەبانی و جۆناسان پاوڵ

قوباد تاڵەبانی، جێگری سەرۆکی ئەنجوومەنی وەزیران پیشوازی کرد لە جۆناسان پاوڵ، راوێژکاری ئاسایشی نیشتمانیی بەریتانیا و پێکەوە تاوتوێی چەند پرسێکی جێی بایەخی هەردوولایان کرد.

لە کۆبوونەوەکەدا کە رۆژی دووشەممە (19/10/2026) لە هەولێر بە ئامادەبوونی عیرفان سدیق، باڵیۆزی بەریتانیا بەڕێوەچوو، قوباد تاڵەبانی سوپاسی هاوکارییە سەربازییەکانی بەریتانیای کرد بە تایبەت لە کاتی شەڕی داعش و لە پرۆسەی یەکخستنەوەی هێزەکانی پێشمەرگەدا. هیواشی خواست هاوکارییەکان لە چوارچێوەی راهێنان و زیاتر بە دامەزراوەییکردنی هێزەکانی پێشمەرگە و کردنەوەی کۆلێژی ئاسایشی نیشتمانیی زانکۆی سلێمانیدا بەردەوام بێت.

جێگری سەرۆکی ئەنجوومەنی وەزیران ئاماژەی بەوەشدا لە دوای یەکخستنەوەی هێزەکانی پێشمەرگە، کاردەکەن بۆ رێکخستنەوە و دروستکردنی هەماهەنگی لەنێوان هەموو هێزە ئەمنی و هەواڵگرییەکانی هەرێمی کوردستان.

لە بەشێکی دیکەی کۆبوونەوەکەدا باس لە هەوڵەکانی پێکهێنانی حکومەتی نوێی هەرێمی کوردستان کرا. هەردوولا هاوڕابوون پێکهێنانی حکومەتێکی یەکگرتوو و بەهێز لە هەرێم کاریگەریی گرنگی دەبێت بۆ سەر پاراستنی ئاسایش و سەقامگیری هەرێمی کوردستان و عێراق.

سەبارەت بە دۆخی سیاسیی عێراقیش، قوباد تاڵەبانی تەواوکردنی پرۆسەی پێکهێنانی کابینەی حکومەتی فیدڕاڵی بە هەنگاوێکی گرنگ ناوبرد و بە پێویستی زانی لە دوای ئەم هەنگاوەوە هەردوو حکومەتی هەرێم و فیدراڵ هەوڵەکان چڕتر بکەنەوە بۆ لێکتێگەیشتنی زیاتر و چارەسەرکردنی کێشەکانی نێوانیان.

لە تەوەرێکی دیکەی کۆبوونەوەکەدا باس لە پرسی کۆچی نایاسایی کرا. لەمبارەیەوە جەخت کرایەوە لەسەر زیاترکردنی هەماهەنگی و کاری هاوبەش بۆ رێگریکردن لە کۆچی نایاسایی گەنجان. جێگری سەرۆکی ئەنجوومەنی وەزیران روونیکردەوە گەشەپێدانی ئابووری و بە تایبەتیش گەشەپێدانی ئەو ناوچانەی بەرزترین رێژەی کۆچیان هەیە، باشترین رێگەچارەی کەمکردنەوەی کۆچی نایاساییە. لەم چوارچێوەیەشدا ئاماژەیدا بە گرنگیی دەزگای پەرەپێدانی راپەڕین و داوایکرد حکومەتی بەریتانیا زیاتر هاوکاری ئەو دەزگایە بکات بۆ گەشەپێدانی دەڤەری راپەڕین و رەخساندنی هەلی کار بۆ گەنجانی ئەو دەڤەرە.

PUKMEDIA