مه‌كته‌بی راگه‌یاندن و هۆشیاری، میدیاكاری دێرین فه‌رهاد سه‌نگاوی به‌سه‌ر ده‌كاته‌وه

PUKMEDIA

وەفدی مه‌كته‌بی راگه‌یاندن و هۆشیاری لەگەڵ میدیاكاری دێرین فه‌رهاد سه‌نگاوی

له‌ چوارچێوه‌ی سه‌ردانه‌كانی خۆیدا بۆ لای نوسه‌ران و رووناكبیران و میدیاكارانی دێرینی كورد و یەکێتیی نیشتمانیی کوردستان، پێشنیوه‌ڕۆی ئه‌مڕۆ مه‌كته‌بی راگه‌یاندن و هۆشیاری به‌ وه‌فدێكی باڵا سه‌ردانی نوسه‌ر و میدیاكاری كورد و بێژه‌ری دێرینی ئێزگه‌ی ده‌نگی گه‌لی كوردستان، به‌ڕێز فه‌رهاد سه‌نگاوی‌ له‌ شاری سلێمانی كرد.

وه‌فده‌كه‌ی مه‌كته‌ب كه‌ به‌سه‌رپه‌رشتی هه‌ڤاڵ له‌تیف نێروه‌یی ئه‌ندامی سه‌ركردایه‌تی و لێپرسراوی بۆردی راگه‌یاندنی سه‌ربه‌ مه‌كته‌ب بوو، دوای به‌خێرهاتنه‌وه‌ له‌و هه‌ڤاڵه‌ دێرینه‌ی یه‌كێتی بۆ وڵات، چه‌پكه‌گوڵی رێزو وه‌فایان پێشكه‌شی به‌ڕێزیان كردو ساڵانی پڕ له‌ سه‌روه‌ریی كاری میدیایی و خزمه‌تكردنی بێوێنه‌ی ئه‌ویان له ئێزگه‌ی ده‌نگی گه‌لی كوردستان و ده‌زگاكانی تری راگه‌یاندنی شۆڕشی نوێی گه‌لی كورد به‌ رابه‌رایه‌تیی یەکێتیی نیشتمانیی کوردستان به‌رز نرخاند‌.

وه‌فده‌كه‌ی مه‌كته‌ب له‌ نزیكه‌وه‌ گوێیان له‌ هه‌موو راز و ره‌خنه‌و بیرۆكه‌و پێشنیاره‌كانی  فه‌رهاد سه‌نگاوی گرت و هیوایان خواست كه‌ به‌ ئه‌زموون و په‌رۆشی و دڵسۆزیی خۆیه‌وه‌ به‌شداربێت له‌ هه‌موو ئه‌و كارو چالاكییه‌ رووناكبیری و میدیاییانه‌ی كه‌ له‌ خزمه‌تی دۆزی ره‌وای گه‌له‌كه‌ماندان و پێویستییان به‌ بیروڕای جیاوازی كاراكته‌رانی سیاسیی و میدیایی كورد و یەکێتیی نیشتمانیی کوردستان هه‌یه‌، به‌تایبه‌تی كه‌ یه‌كێتی ده‌ستی به‌ به‌هاو ئازادیی بیروڕا و ره‌خنه‌گرتنه‌وه گرتووه‌و سه‌رچاوه‌ میدیایی و سه‌كۆ روناكبیری و هزرییه‌كانی واڵا كردووه‌ بۆ گوێگرتن له‌ هه‌موو بیرۆكه‌و ره‌خنه‌و پرۆژه‌یه‌ك.

له‌ دیداره‌كه‌دا، فه‌رهاد سه‌نگاوی، وه‌ك كادرێكی دێرینی شۆڕشی نوێی گه‌لی كورد، سوپاسی زۆری وه‌فده‌كه‌ی مه‌كته‌بی راگه‌یاندن و هۆشیاریی كردو بیروڕای خۆی له‌سه‌ر چه‌ند دۆسێیه‌كی ناوخۆیی و نه‌ته‌وه‌یی و نێوده‌وڵه‌تی خسته‌ڕوو، جه‌ختی له‌وه‌ كرده‌وه‌ كه‌ پێویسته‌ كه‌موكورتییه‌كانی ئه‌زموونی فه‌رمانڕه‌واییش له‌ هه‌رێمی كوردستاندا راست بكرێنه‌وه‌و گوێ له‌ هه‌موو خه‌مخۆرانی نیشتمان و یەکێتیی نیشتمانیی کوردستان بگیرێت، له‌ كۆتایی دیداره‌كه‌شدا له‌ كه‌شێكی پڕ له‌ رێزو خۆشه‌ویستیدا چه‌ند وێنه‌یه‌كی یادگاری تۆمار كران.

PUKMEDIA