دادگاى سلێمانى: شوقە و خانوو بەناوى عەرەب و بیانییەوە ناکرێت

PUKMEDIA

کۆمەڵگەیەکی نیشتەجێ بوون لە سلێمانی

ئەمڕۆ 21ی10ی2026، دادگاى کارگێڕى سلێمانى، بڕیارێکی پێشووی پارێزگای سلێمانی هەڵوەشاندەوە و بڕیاریدا لەمەودوا بەهیچ شێوەیەک موڵک و زەوى و شوقە بە عەرەب و بیانى نەفرۆشرێت.

ئومێد جاف، پارێزەر لە پەڕەی تایبەتی خۆی لەتۆڕی کۆمەڵایەتی فەیسبووک ئاماژەی بەوەکردووە، دادگای کارگێڕی سلێمانی، لەسەر شێواندنی دیمۆگرافیای کوردستان و بە تایبەتی سلێمانی، لە بارەی فرۆشتنی موڵک و خانوو زەوی بە هاووڵاتییانی عەرەب و بیانی لە سلێمانی، بڕیاریدا لەمەودوا بە هیچ شێوەیەک موڵک و زەوی و شوقە بە عەرەب و بیانی نەفرۆشرێت، بەشێوەیەک لە رۆژی 21ی10ی2026،  دادگای کارگێڕیی سلێمانی لە دۆسیەی داوای ژمارە (57/ك/2026)، بڕیارێکی بۆ پاراستنی ناسنامەی دانیشتوان لەهەرێمی کوردستان دەرکرد، کە بۆ یەکەمین جارە لە دادگاکانی هەرێمی کوردستان بریارێکی لەم شێوەیە دەردەچێت.

دادگا بریاریدا بە هەڵوەشاندنەوەی فەرمانی کارگێڕیی ژمارە (6448 لــە 6/6/2026)ی پارێزگای سلێمانی، کە رەزامەندیان داوە بە (تۆمارکردنی شوقەو خانوو بە ناوی هاووڵاتیانی عیراقی و هاووڵاتیانی بیانی هاوشێوەی هاووڵاتیانی سلێمانی، لەژێر ناوی "گەشەپێدانی بواری گەشتیاری و ئابووری" .

فەرمانی پارێزگار هۆکاربووە بۆ کۆچی بە لێشاوی نیشتەجێبوونی هەمیشەیی هاووڵاتیانی ناوەراست و خواری عیراق بۆ هەرێمی کوردستان و شێواندنی پێکهاتەی ڕەسەنی شاری سلیمانی،کە ئەمەش پێچەوانەی ئامانجەکانی دەستوری هەمیشەیی عیراقە، بەهۆی لێشاوی کۆچکردنی نەتەوەی عەرەب بۆ هەرێمی کوردستان.

بڕیارەکەی دادگای سلێمانی، هاوتەریبە لەگەڵ مافە دەستووریەکانی خەڵکی رەسەنی کوردستان، کە لە دەقی ماددەی (23/سێیەم/ ب)، بە شێوەی رەها(مطلق) قەدەغەی هەر جۆرە خاوەندارێتییەک دەکات، ئەگەر ئامانج لێی گۆڕانکاریی دیمۆگرافی بێت.

PUKMEDIA