قوباد تاڵەبانی پێنج ملیار دینار بۆ قەزای رزگاری تەرخاندەکات

راگەیاندنی حکومەتی هەرێمی کوردستان

قوباد تاڵەبانی

لەدوای بڕیاری بەقەزابوونی رزگاری جێگری سەرۆکی ئەنجومەنی وەزیرانی هەرێم بڕی پێنج ملیار دیناری بۆ پڕۆژە خزمەتگوزارییەکانی قەزاکە تەرخانکرد.

ئەمڕۆ پێنجشەممە 25ی ئەیلول، جەمال مام ساڵح، بەڕێوەبەری ناحیەی رزگاری رایگەیاندووە: لەسەر بڕیاری قوباد تاڵەبانی، جێگری سەرۆکی ئەنجومەنی وەزیرانی هەرێم بڕی پێنج ملیار دینار بۆ پڕۆژە خزمەتگوزارییەکانی قەزای رزگاری سەر بە ئیدارەی گەرمیان تەرخانکراوە، هەروەها لە داهاتوشدا لەپێناو خزمەتکردنی زیاتری قەزاکە ژمارەیەک بەڕێوەبەرایەتی دەهێندرێنە رزگاری.

ئاماژەی بەوەشکردووە: لەرابردوودا ژمارەیەک زەوی لە رزگاری فرۆشراون و بڕی دوو ملیار و 750 ملیۆن دیناری تریش کە هی فرۆشتنی ئەو زەویانەن بەهەمان شێوە بۆ پڕۆژە خزمەتگوزارییەکان تەرخاندەکرێن.

هەرلەوبارەیەوە، جەلال شێخ نوری ،سەرپەرشتیاری ئیدارەی گەرمیان سوپاسی قوباد تاڵەبانی، جێگری سەرۆکی ئەنجومەنی وەزیرانی هەرێمی کرد و رایگەیاند لەماوەکانی رابردوودا رۆڵی کارای هەبووە لە رێککارەکانی بەقەزابوونی رزگاری و پشتگیری تەواویان کردووین.

ئەمەش لەدوای ئەوەدێت لە رۆژی چوارشەممە 24ی ئەیلولی 2025 جەلال شێخ نوری ،سەرپەرشتیاری ئیدارەی گەرمیان بەقەزابوونی ناحیەی رزگاری راگەیاند کە ژمارەی دانیشتووانەکەی زیاترە لە 50 کەس و نزیکەی 14 هەزار خێزانی تیدایە.

PUKMEDIA