سلێمانی شۆڕشێكی نوێ لەچارەسەركردنی شێرپەنجە رادەگەیەنێت

PUKMEDIA

دكتۆر یاد نەقشبەندی، بەڕێوەبەری نەخۆشخانەی هیوا

یەكەمین كۆنفرانسی نەخۆشی شێرپەنجە لەسلێمانی بەبەشداری زیاتر لە 200 شارەزا، پزیشك، توێژەرو سەركردەی چاودێری تەندروستی و پسپۆڕی نێودەوڵەتی راگەیەندراو بەڕێوەبەری نەخۆشخانەی هیواش دەڵێت: كاری جددیمان كردووە بۆ فراوانكرنی خزمەتگوزارییەكانمان و ئەنجامدانی ئەم كۆنفرانسەش، شۆڕشێكی نوێ دەبێت لەچارەسەری نەخۆش و هەنگاوی زیاترو نوێتریش دەنێین.

ئەمڕۆ 26ی 8ی 2026، دكتۆر یاد نەقشبەندی، بەڕێوەبەری نەخۆشخانەی هیوا، لەكۆنگرەیەكی رۆژنامەوانیدا راگەیاندنی یەكەمین كۆنفرانسی نەخۆشی شێرپەنجەی ئاشكرا كردو ئاماژەی بەوەكرد: كۆنفرانسەكە لە رۆژانی 4 و 5ی2ی2027 لە شاری سلێمانی بەڕێوەدەچێت و تیشك دەخانە سەر خۆپاراستن لەشێرپەنجە، دەستنیشانكردنی پێشوەختە، چارەسەرو توێژینەوە، ئەمە جگە لەوەی سلێمانی وەك سەنتەرێكی گەشەسەندوو بۆ پەرەپێدانی پزیشكی و هاوكاریی نێودەوڵەتی لە چاودێری شێرپەنجە دەناسرێنرێت.

وتیشی: كۆنفرانسەكە بەسەرپەرشتی بەڕێوەبەرایەتی تەندروستی سلێمانی و سندوقی شێرپەنجەو بەهەماهەنگی زانكۆی سلێمانی و رێكخراوی ئیلیت بەڕێوەدەچێت، كە ئامانج لێی هۆشیاری گشتیی و چارەسەركردنی تووشبووانی نەخۆشییەكەیە.

بەڕێوەبەری نەخۆشخانەی هیوا راشیگەیاند: كۆنفرانسەكە بەبەشداریی سەرجەم سەنتەرە شێرپەنجەییەكانی هەرێم و عیراق بەڕێوەدەچێت و تێیدا چەندین وۆرك شۆپی زانستی پێشكەش دەكرێن،  هاوكات كار لەسەر هێنانەپێشەوەی خزمەتگوزاری ئەی ئای بۆ تووشبووانی شێرپەنجە دەكرێت و ئەو خزمەتگوزارییەش دەخەینە خزمەت تووشبووانی شێرپەنجە.

ئەوەشی خستەڕوو: یەكەمین كۆنفرانسی نێودەوڵەتی شێرپەنجە بەبەشداری زیاتر لە 200 شارەزا، پزیشك، توێژەرو سەركردەی چاودێری تەندروستی و پسپۆڕی نێودەوڵەتی بەڕێوەدەچێت، ئامانجیش لێی هۆشیاری گشتیی و چارەسەركردنی نەخۆشییەكەیە، چونكە هەرهەنگاوێكی زانستی بۆ خزمەتی توشبووانەو بۆ ئەوەیە نەخۆشخانەكەمان لەپلەی یەكەمی عیراق و هەرێمی كوردستاندا بمێنێتەوە.

دكتۆر یاد نەقشبەندی، بەڕێوەبەری نەخۆشخانەی هیوا وتیشی: لەسەر راسپاردەی قوباد تاڵەبانی، جێگری سەرۆكوەزیرانی هەرێم، بەشێك لە نەخۆشخانەی هیوا وەك سەنتەرێكی شێرپەنجە لەسنووری ئیدارەی راپەڕین دەكرێتەوە.

PUKMEDIA