بەرەڤ یادا مەزن.. بلا ئێكەتی هەر پێشڕەو بمینیت

PUKMEDIA

ئیمان ئامێدی

ئیمان ئامێدی

پشتی چەند رۆژەكێن كێم یادا (48) مین ساڵڤەگەڕا دامەزراندنا حزبا سیما كەسك و خودانا زێدەتر ژ (20) هزار شەهیدان و هەلگرا پەیاما رەسەنا كوردایەتیێ دێ هێتە گێڕان.. یادا (48)مین ساڵرۆژا دامەزراندنا ئێكەتی نیشتمانی كوردستان كو هەڤدەم یادا (47)مین ساڵرۆژا بەرپابوونا شۆرەشا نووی یا گەلێ كوردستانێ یە.

 ئەو ئێكەتیا مێژوو گوهارتی، دقۆناغەكا سەخت و دژوار و دناڤ هەلەمۆرا شكەستنا شۆڕەشا ئیلۆنێدا ژدایكبوویی و شكەستن ب شكەستنێ ئینای و بوویە پێشەوا و مەزنترین بەرپسیاری د دیروكا بزاڤا رزگاریخوازا كوردیدا بستوویێ خۆڤە گرتی، و د وی سەردەمێ دژوار و ژانداردا بوو ئومێدا گەلەكێ ستەمدیتی و دەنگێ ڕەوایێ خەلكێ كوردستانێ ل دژی زولم و ستەم و ركابەری و بەرهنگاریا هەژموونا نەحەز و داگیركەران كر.

ئەگەر ل پێشی (48) ساڵان ستراتیژیەتا ئێكەتیێ تیماركرنا برینێن شكەستنێ و هەلچنینا باوەریێ بیت، ئەگەر ئارمانجا وێ د وی سەردەمیدا دروستكرنا پرێن پەیوەندیان بیت دناڤبەرا جەماوەر و گیان لسەر دەستان، كو دماوەكێ زۆر كورت و كێم دا شیا ب ڕاگەهاندنا دامەزراندنێ دووبارە هیڤی و ئومێدا دسینگێ خەلكێ كوردستانێدا گەش بكەت.. ئەگەر ژ دامەزراندنێ و هەتا سەرهەلدانێ و قۆناغێن بەڕەڤانیێ ژ ئەزموون و قەوارێ هەرێما كوردستانێ ئەركێ ئێكەتی نیشتمانی بەخشینا رووبارەكێ خوین بیت پێخەمەت پاراستن و بدەستڤەئینانا ماف و ئازادیێن گەلێ كوردستانێ و بدووماهی ئینانا سەردەمێن چەوساندنێ، كو د وان سەردەماندا ئێكەتی شوویرها پیلایا بەڕەڤانی و بەرخوادنێ بوو لهەمبەر پیلانێن داگیركاری و گوهرینا دیمۆگرافیا كوردستانێ.. پێدڤیە بزانین ئەڤرۆ ئەرك و ئارمانجێن ئێكەتیێ زۆر مەزنترن و گرنگترن و ستراتیژیا وێ ژی دوورمەودا ترە.

پشتی بەستنا چوارەم كۆنگرە كو ب كۆنگرێ نوویبوونەڤێ دهێتە نیاسین، ئێكەتی نیشتمانی ئەركێ رێبەری و دروستكرنا رەوت و بەرەیەكێ ناڤخۆیێ بهێز وەرگرتییە، دا ب رێیا كۆدەنگیەكا نیشتمانی پرسێن گرێكەدار ڤەكەت و گلولكێن ئالۆزێن پەیوەندیێن لایەنان هەلچنیت و سەر ژنووی نەخشەرێیەكێ گونجای بۆ ئایندەی دارێژیت.

پێدڤییە دڤی سەردەمیدا زۆر ب هشیاری سەرەدەریێ دگەل پێشهاتێن ناڤخۆیی و عیراقی و ئەقلیمی و نێڤدەولەتی بكەت، رەوشا هەرێمێ ب سازان و ل گورەی یاسا و دهەڤگەهشتنێن هەمەلایەن ژ حوكمڕانیەكا نە ساخلەم بەرەڤ ئاقارەكێ باشتر و بەرهەمدارتر ژ روویێن سیاسی و دیموكراسی و ئابووری و كۆمەلایەتی ڤە ببەت.

پێخەمەت مسوگەركرنا ڤێ ئارمانجێ ژی ئێكەتی دەستێ دوستایەتیێ بۆ سەرجەم هێز و لایەنێن سیاسیێن كوردستانی درێژ كرییە، هەموو دەم و ل گورەی هەموو بوار و فشاران پێخەمەت بەڕژەوەندی و داخوازی و شایستەیێن گشتی، ئێكەتی نیشتمانی دەستبەرداری مافێن خۆ یێن حزبی بووییە و هەموو جارەكێ دەستپێشخەر بوویە بۆ چارەسەركرنا كێشە و قەیران و گرفتان دگەل لایەنێن بەرامبەر.

ل سەر ئاستێ عیراقێ ئێكەتی بەردەوام پەنایێ دبەتە بەر دەستوور و یاسایێن كارپێكری بۆ بدەستڤەئینانا ماف و شایستەیێن خەلك و قەوارێ‌ هەرێمێ و ل گورەی یاسایێ سەرەدەریێ دگەل پێشهاتان دكەت، هەڤدەم پەیوەندیێن خورستی دگەل سەرجەم هێز و حزب و لایەنێن سیاسیێن عیراقی بێی جوداهی و دوور ژ رەهەندێن نەتەوی و ئایینی و تایفەگەری ئاڤا كرینە، بەلێ‌ گرنگە دڤێ قۆناغێدا ئێكەتی هەوڵێن رژد بدەت بۆ ئێكلاكرنا پرسا دەڤەرێن ڤەقەتیای ل گورەی ماددێ (140) ژ دەستووری و دابینكرنا زەمینەكێ كۆمەڵایەتیێ گونجایێ پێكڤە ژیانێ ل وان دەڤەران.

ل سەر ئاستێ چوار پارچێن كوردستانێ ژی، ئێكەتی نیشتمانی هەلگرا ناسناما خۆ یا دێرینە، وەكو مێژوویا وێ ب خوینا شەهیدان سەلماندی پشتەڤان و بەڕەڤانیكارە ژ مافێن گەلێ كورد ل هەرچوار پارچان و هێشتا ب ڕژدی پێداگیریێ لسەر وی پرنسیپێ خۆ یێ نەگۆڕ دكەت.

كەواتە ئێكەتی هێشتا وەك خودیكا لبەر هەتاڤێ، هەلگرا ئارمانجێن سیاسیێن روون و زەڵالە دگەل لایەنێن كوردستانی، دیسان خودان هێلەكا ڕاستەقینەیە دگەل بەغدا، و ب بێلایەنی و بەرپسیاری سەرەدەریێ دگەل ستراتیژ و تەكتیكێن هەڤسەنگ دكەت پێخەمەت ئەنجامدانا گوهرینكاریان د سەرجەم پرس و دۆسیێن هەستیار و چارەنڤیسسازدا.

PUKMEDIA