ئەگەر مام جەلال بمایە ئەمانە نەدەقەومان!!

PUKMEDIA

رێبین عومەر

رێبین عومەر

سیاسەت لە زەمەندا روودەدات زەمەنیش رەحم بە هیچ كەس ناكات.

غیابی سەرۆك مام جەلال زیانی گەورەی بە پڕۆسەی سیاسی كوردستان و عیراق گەیاندووە، كاریگەرییەكەشی بۆ دوورمەودا دەمێنێتەوە، سەرۆك مام جەلال چەندە لە یەكێتی رۆیشت دوو ئەوەندە لە حزبە سیاسییەكانی كوردستان و پڕۆسەی سیاسی رۆیشت، مام جەلال كارەكتەرێكی حەكیم بوو، پشوو درێژبوو باش لە مێژوویی حزبەكان و كارەكتەرە سیاسی و كۆمەڵایەتییەكانی ناوخۆو ناوچەكەو جیهان گەیشتبوو، سیاسەتمەدارێكی قوڵ و دوورمەودابوو لە سەرتاشەبەردەكانی قەندیلەوە ئایندەی باش دەبینی هەربەوجۆرەش هیچ وێستگەیەك نەمابوو لە مێژوویدا كە دەستەوەستان وەستابێت هەرگیز بێدەربەست نەبوو.

 ئەزموون و خەباتی سەخت مام جەلالی كردبووە سەرۆك، بێ كورسی و عەرش هەر خۆی سەرۆك بوو، تەنانەت ئەوكاتەی لە شام لە ناوەڕاستی حەفتاكاندا كارەكتەرێكی بەرهەڵستكاری رژێمی بەعس بوو لە تاراوگە نەخشەرێگەی دیموكراسی دەكێشا بۆ ئایندەی عیراق، سورییەكان و سەرۆكی ئەوكاتەی سوریا (حافز ئەسەد) وەك سەرۆك مامەڵەی لەگەڵ (ئەبوشەلال) ئەكرد، دیدارە چەند سەعاتییەكانی گەواهیدەری گەورەی مام جەلال دەردەخات كە سەرۆكەكان و غەیرە كوردەكان وەك سەرۆك دەیان بینی و مامەڵەی راستەوخۆیان لەگەڵ دەكرد. بە ئیعترافی (حافز ئەسەد) باسی لەوەكردووە كە (ئەبوشەلال) واتە (مام جەلال) عاقڵمەندوو دانای سیاسی ناو پڕۆسەی سیاسی عیراق و ناوچەكەیە.

 لە 1989 تا  1993 مام جەلال لەگەڵ توركت ئۆزال سەرۆكی توركیا نەخشەی ئاشتی ناوچەكەی دارشت و نێوەندگیریی ئاشتی نێوان تورك و كوردبوو، بۆ ئەمڕۆ زیاتر لەهەمووكات پێویستمان بە مام جەلال-ە، نەمانی گورزی لە هەژموونی دیموكراسی و یەكڕیزی و تەبایی داوە. 

بەڵام بە گەڕانەوە بۆ حیكمەت و رێگەو رێبازی مام جەلال چارەسەری برینەكانەو گرفتەكان ئاسان دەكرێت.

لە بارەی مەسئولییەتی ئەم قۆناغەش بەتەنها لەسەرشانی یەكێتی نییە

 بەڵكو پشكی زیاتر لەسەر شانی پارتییە، دواین دیداری یەكێتی و پارتی بۆ خەڵك جێگەی هیوابوو، بەڵام نیگەرانییەكانی سەرۆك بافڵ سەرۆكی یەكێتی خێراو لەجێگەی خۆی بوو، چونكە سیاسەتی بانێك و دوو هەوا بێ كردارە بۆ ئەمڕۆ بێ سودەو زیانی دەبێت.

بە پێچەوانەوە ئەگەر مام جەلال لە ژیاندا بمایە، ئەوا زۆر بەئاسانی بەگەورەیی خۆی دوور لە توانەوەو موئامەرە بە كۆكردنەوەی هەردوو مەكتەبی سیاسی یەكێتی و پارتی وەك سەرۆكێكی  كوردستانی، تەنگەژەكانی چارەدەكردو حەقی كەسی بەسەر كەسەوە نەدەهێشت.
 ئێستا لە واقعدا مام لێرە نییە بەڵام حیكمەت و دانایی و سێبەرو سەیوانی زیندووە و یەكێتیی بەرابەرایەتی سەرۆك بافڵ خاوەن ئیرادەو هێزە.


PUKMEDIA