سه‌رنجێك كه‌ به‌ئه‌ركی خۆمی ده‌زانم

تایبەت

هێڤار محمد عمر

هێڤار محمد عمر*

ده‌ست و په‌نجه‌ و قه‌ڵه‌می ئازادی و بوێری كۆتوبه‌ند ناكرێت ، ئه‌مه‌ خه‌سڵه‌تی ئه‌و كه‌سانه‌یه‌ كه‌ له‌ كۆمه‌ڵگایه‌كی  زیندوو دا خه‌می گشتی و مافی گشتی خه‌ڵك بۆته‌ ئه‌ركی سه‌ره‌كی سه‌رشانیان یه‌كێك له‌و كه‌سانه‌ هاوكار و هاوپیشه‌مان (شێروان شێروانی)ییه‌، كه‌ ئاشكرایه‌ و له‌ مێژوودا سه‌لمێندراوه‌ زیندان ڕێگه‌ له‌ ده‌نگ و ئیراده‌ی ئازاد ناگرێت، بۆیه‌ پێویسته‌ كه‌ ده‌سه‌ڵات دارانی هه‌رێمی كوردستان له‌وه‌بگه‌ن‌ كه‌ ڕه‌وشی مافی مرۆڤ و ئاستی ئازادی ڕاده‌ربڕین له‌ ئاستێكی زۆر خراپ و مه‌ترسیداردایه‌ كه‌ ئه‌مه‌ بێگومان پڕه‌نسیپ و بنه‌ماكان له‌ ده‌ستوری عێراقدا چه‌سپاوه‌ و ئه‌م مافه‌ جێگیركراوه‌ و ناكرێت و نابێت به‌ پێچه‌وانه‌ی ئه‌و مافه‌ ده‌ستوریانه‌ مامه‌ڵه‌ له‌گه‌ڵ ڕۆژنامه‌نووس و چالاكوان و كارمه‌ندانی دام و ده‌زگا ئه‌منی و حوكومیه‌كان و پارێزه‌راندا بكرێت.

 ناڕه‌وایه‌ و نا یاساییه‌ كاتێك سه‌كۆ و مینبه‌ره‌كانی ده‌سه‌ڵات ببنه‌ مایه‌ی هه‌ڕه‌شه‌ و ترساندن و تۆقاندنی ده‌نگی ئازادی و بوێری كه‌ داكۆكی له‌ ئاڕاسته‌ی گشتی و داواكاریه‌كان ده‌كات له‌ چوارچێوه‌ی شه‌رعیه‌تی یاسای و ده‌ستوری و كۆمه‌ڵایه‌تی و مێژووی و ویژدانی و ئه‌خلاقی، به‌كارهێنانی دام و ده‌زگا یاساییه‌كان بۆ ئه‌م مه‌به‌سته‌ خۆی له‌ خۆیدا تاوانێكی ناڕه‌وایه‌ ده‌رحه‌ق به‌ گه‌ل و نیشتیمان.

بۆیه‌ ئێمه‌ وه‌كو پارێزه‌ر و ڕۆژنامه‌ نووس ده‌نگی خۆمان ده‌خه‌ینه‌ پاڵ ده‌نگی به‌ره‌ی گه‌ل و ڕه‌وتی ئازادی و سه‌ربه‌ستی و ئاشتی و ده‌نگی پێشكه‌وتن خوازان له‌م باره‌یه‌وه‌ داواده‌كه‌ین لایه‌نه‌په‌یوه‌ندی داره‌كان و دامه‌زراوه‌  ده‌ستوریه‌كان له‌ هه‌رێم و له‌ به‌غدا و ناوه‌نده‌ په‌یوه‌ندیداره‌ نێوده‌وڵه‌تیه‌كان به‌ ئه‌ركی پێویست و مێژووی خۆیان سه‌ربه‌خۆیانه‌ و بابه‌تیانه‌ له‌سه‌ر ئه‌م زه‌نگه‌ مه‌ترسیداره‌ و ڕیگه ‌به‌وه‌نه‌درێت به‌ناوی یاساوه‌ مافی سروشتی و ده‌ستوری له‌ ئازادی ڕاده‌ربڕینی مرۆڤ بگرێت.

به‌پێی پێوه‌ره‌ یاسا و ده‌ستورییه‌ نێوده‌وڵه‌تیه‌كان  له‌ هه‌موو جیهاندا، به‌تایبه‌تی كه‌ له‌ ماده‌كانی (37) و (38) دا له‌ ده‌ستوری عێراقی هه‌میشه‌یدا هاتووه‌ وه‌ له‌سه‌رجه‌م ڕێكه‌وتن نامه‌ نێوده‌وڵه‌تیه‌كانی جاڕنامه‌ی جیهانی مافه‌كانی مرۆڤ ساڵی(1948) دا هاتووه‌،  به‌پێچه‌وانه‌وه‌ ئه‌م دیاردانه‌ كه‌ڕووده‌ده‌ن له‌ هه‌رێمدا به‌ده‌ر له‌ یه‌كسانی و دادپه‌روه‌ری كۆمه‌ڵایه‌تی و بنه‌ماكان و پڕه‌نسیپه‌كانی مافی مرۆڤ  و بڕگه‌ و ده‌ق و ڕۆح و فه‌لسه‌فه‌ی  ده‌ستور ، ئه‌زموونی ڕابردوو و ئێستاو ئاینده‌مان ده‌خاته‌ ژێر مه‌ترسیه‌وه‌ به‌ له‌ ده‌ستدانی شه‌رعییه‌تی ناوخۆی و نێوده‌وڵه‌تی وه‌كو تاوانێكی مێژووی دژ به‌ گه‌ل و نیشتیمان.

*نوسه‌ر و پارێزه‌ر

PUKMEDIA