سه‌رۆكی یه‌كێتی: هیچ پانتاییه‌ك بۆ تیرۆر و تیرۆرستان نه‌هێڵینه‌وه‌

PUKMEDIA

سەرۆک بافڵ

سه‌رۆكی یه‌كێتیی نیشتمانیی كوردستان رایده‌گه‌یه‌نێت:" تۆڵه‌ی خوێنی شه‌هید جوامێر ده‌كه‌ینه‌وه‌و وه‌كچۆن به‌ڵێنمانداوه‌ هیچ پانتاییه‌ك بۆ تیرۆر و تیرۆرستان نه‌هێڵینه‌وه‌، ئه‌م كۆسته‌ گه‌وره‌یه‌ش سوورترمان ده‌كات به‌توندترین شێوه‌ رووبه‌ڕ‌وویان ببینه‌وه‌".


بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان په‌یامێك ئاڕاسته‌ی خانه‌واده‌ی شه‌هید جوامێر ده‌كات و ئاماژه‌ بۆ ئه‌وه‌ده‌كات:" شه‌هیدبوونی (جوامێر عه‌زیز ره‌شید) تێكۆشه‌ری كوردستان و كارمه‌ندی هێزه‌كانی ده‌زگای ئاسایشی هه‌رێم له‌ رووبه‌ڕ‌ووبوونه‌وه‌یه‌كی تیرۆرستانی داعش له‌ قه‌ره‌هه‌نجیر، خه‌مێكی گه‌وره‌یه‌ و له‌ دڵه‌وه‌ نیگه‌رانین.

ده‌شڵێت:"شه‌هید جوامێر له‌پێناو سه‌رفرازیی خه‌ڵك و سه‌قامگیریی خاكه‌كه‌مان گیانی به‌ختكرد و ئه‌مه‌ش به‌رزترین پله‌ شه‌هاده‌ته‌ كه‌ هه‌رگیز له‌یادی ناكه‌ین، كه‌سوكاره‌ سه‌ربه‌رزه‌كه‌شی دڵنیاده‌كه‌ینه‌وه‌ تۆڵه‌ی خوێنی شه‌هید جوامێر ده‌كه‌ینه‌وه‌و وه‌كچۆن به‌ڵێنمانداوه‌ هیچ پانتاییه‌ك بۆ تیرۆر و تیرۆرستان نه‌هێڵینه‌وه‌، ئه‌م كۆسته‌ گه‌وره‌یه‌ش سوورترمان ده‌كات به‌توندترین شێوه‌ رووبه‌ڕ‌وویان ببینه‌وه‌".

له‌په‌یامه‌كه‌ی سه‌رۆكی یه‌كێتیدا هاتووه‌:"له‌خوای گه‌وره‌ داواكارم شیفای كارمه‌نده‌ برینداره‌كان بدات و سوپاسی دڵسۆزی و خۆڕ‌اگرییان ده‌كه‌ین. ستایشی هه‌وڵ و شه‌ونخوونی هێزه‌كانی ئاسایش و سه‌رجه‌م هێزه‌ ئه‌منییه‌كانی كوردستان ده‌كه‌ین كه‌ ماندوونه‌ناسانه‌ سه‌قامگیریی هه‌رێمه‌كه‌مان و ژیانی خه‌ڵكه‌ خۆشه‌ویسته‌كه‌مان ده‌پارێزن، هاوكات پرسه‌ و هاوخه‌میی قووڵی خۆمان ئاڕ‌استه‌ی كه‌سوكاری سه‌ربه‌رزی كاك جوامێر عه‌زیز و هه‌ڤاڵانی ده‌كه‌م و هاوبه‌شی ئه‌م ماته‌مه‌م، خوای گه‌وره‌ هه‌ڤاڵ جوامێر به‌ به‌هه‌شتی به‌رین شادبكات و سه‌بووری به‌هه‌موولایه‌ك ببه‌خشێت."

سەرلەبەیانی ئەمڕۆ  14/7/ 2024 رووبەڕووبوونەوەیەک لە نێوان ئاسایش و دوو چەکداری داعشدا لە قەرەهەنجیر روویدا و لە ئەنجامدا ئاسایشێک شەهید بوو یەکێکی تریش برینداربوو، هاوکات یەکێک لە تیرۆرستەکان کوژرا و ئەویدیکەشیان بەبرینداری دەستگیرکرا.

PUKMEDIA