قائیمقامی سلێمانی سەرکەوتنى پلانى رۆژانى جەژنى راگەیاند

ئاژانسەکان

سلێمانى

قائیمقامی سلێمانی رایدەگەیەنێت، پلانی رۆژانی جەژنی قوربانی پیرۆز بەسەرکەوتویی جێبەجێ کراوە و سوپاسی تەواوی لیژنە هاوبەشەکان، ئاسایش، هێزە ئەمنییەکان و فەرمانگە خزمەتگوزارییەکان دەکات و ئاشکراشی دەکات، سەرجەم دەستگیرکراوەکانی جەژن کە کڕین و فرۆشتنیان بە ئاژەڵەوە لە شوێنى نەشیاو کردووە ئازاد دەکرێن.

 ئاوات محەمەد، قائیمقامی سلێمانی رایگەیاند: "ژمارەیەک لە ئەو سەرپێچیکارانەی کە کڕین و فرۆشتنیان بەئاژەڵەوە لەشوێنی نەشیاو و نەگونجاوەدا کردوە، دەستگیرکراون، کە مەبەست لەدەستگیرکردنەکەیان نەفرۆشتنی ئاژەڵی ناساغ بووە، بەئەو کەسانەی قوربانی دەکەن، هەروەها سەرجەمیان ئازاد دەکرێن".

هەر لە راگەیەنراوەکەدا هاتووە: "لە چوار رۆژەی جەژنی قورباندا لیژنەکانی قائیمقامیەتی سلێمانی بەردەوام بون لە ئەرکەکانیان و سەردانی تەواوی ئەوشوێنانەیان کردوە کە میوانان و گەشتیارانی شاری سلێمانی بۆ بەسەر بردنی کاتێکی خۆش رویان لێکردوە، ئەمە جگە لە ئەوەی بەهاوبەشی تیمەکانی ئاسایش و پۆلیس هێزە ئەمنییەکانی دیکە تارادەیەکی زۆر رێگرییان لەسەربڕینی ئاژەڵ لە کۆڵان و شەقامەکان کردوە".

 قائیمقامی سلێمانی ئەوەشى خستەڕوو: "ئامانج لە دانانی پلان بۆ رۆژانی جەژن و جێبەجێکردنی لەلایەن ئاسایش و هێزەئەمنییەکانی دیکە و تەندروستی و فەرمانگە خزمەتگوزارییەکان پاراستنی ئەمنییەت و تەندروستی هاووڵاتیانە، بەسوپاسەوە بۆ جەژنی قوربانی ئەمساڵ توانیویانە بەسەرکەوتویی پلانەکە جێبەجێ بکەن".

PUKMEDIA