نزیكه‌ی 300 سكاڵا له‌سه‌ر عه‌جاج تۆمار ده‌كرێت

PUKMEDIA

عەجاج ئەحمەد حەردان

ئه‌مڕۆ 9ی8ی2025 كۆتا رۆژه‌ بۆ تۆماركردنی سكاڵا دژی تاوانبارعه‌جاج، كه‌ له‌ماوه‌ی رابردوودا له‌لایه‌ن نوسینگه‌ی خانمی یه‌كه‌می عیراقه‌وه‌ ده‌ستگیركردنی راگه‌یه‌ندرا، به‌پێی زانیارییه‌كانی PUKMEDIA تائێستا نزیكه‌ی 300 سكاڵا له‌سه‌ر ئه‌و تاوانباره‌ تۆمار كراوه‌.

دڵشاد مه‌جید سه‌رۆكی لیژنه‌ی وه‌گرتنی سكاڵاكان له‌سلێمانی تایبه‌ت به‌ PUKMEDIA ی راگه‌یاند:" سه‌عات 4:00ی دوانیوه‌ڕۆی ئه‌مڕۆ شه‌ممه 9ی8ی2025‌، كۆتا كاته‌ بۆ تۆماركردنی سكاڵا دژی تاوانبار عه‌جاج كه‌ تائێستا نزیكه‌ی 50 سكاڵا له‌لیژنه‌كه‌مان تۆمار كراوه‌ كه‌ به‌شێكی زۆریان له‌ ره‌گه‌زی مێن".

راشیگه‌یاند:" سه‌رجه‌م سكاڵاكاران خۆیان شاهیدی تاوانه‌كانی عه‌جاج-ن، یان تاوانه‌كان به‌رامبه‌ر خۆیان كراوه‌و له‌سكاڵاكاندا تاوانی زۆر قێزه‌ونی تێدایه،‌ كه‌ ئه‌و تاوانباره‌ به‌رامبه‌ر به‌ ژن و منداڵ و پیاوانی كوردی كردووه‌".

ئه‌وه‌شی خسته‌ڕوو:" له‌ چه‌مچه‌ماڵ و كه‌لاریش كاری لیژنه‌كان ئه‌مڕۆ كۆتایی دێت و به‌پێی زانیارییه‌كانی ئێمه‌ تائێستا به‌تێكڕا نزیكه‌ی 300 كه‌س سكاڵایان تۆمار كردووه‌ كه‌ به‌شی زۆریان له‌كه‌لار و چه‌مچه‌ماڵه‌".

سه‌رۆكی لیژنه‌ی وه‌گرتنی سكاڵاكان له‌سلێمانی لەسەر عەجاج ئاماژه‌ی بەوه‌شكرد:"پرۆسه‌كه‌ زۆری به‌باشی به‌ڕێوه‌چوو، ئه‌و پلانه‌ی دانرابوو وه‌ك خۆی و باشتر جێبه‌جێكرا كه‌ سكاڵای زۆر به‌هێز هه‌یه‌ له‌ناو سكاڵاكاندا".

ئەمەش لەكاتێكدایە، رۆژی 31ی 7ی 2025، نوسینگەی خانمی یەكەمی عیراق، دەستگیركردنی تاوانبارێكی شاڵاوەكانی ئەنفال بە ناوی "عەجاج ئەحمەد حەردان" سەرپەرشتیاری زیندانی نوگرە سەلمانی راگەیاند، کە زوڵمی زۆری بەرامبەر زیندانییە کوردەکان کردووە، داواشی لە زیندانیكراوان و كەسوكاری زیندانیكراوان و بێسەر و شوێنبووەكان كرد، بۆ تۆماركردنی سكاڵا دژی ئەو تاوانبارە پەیوەندییان پێوەبكەن، ئەمڕۆش وادەی تۆمارکردنی سکاڵاکە کۆتاییهات.

PUKMEDIA