زیانلێکەوتووانی ڕژێمی پێشوو قەرەبوو دەکرێنەوە

راگەیاندنی دەستەی لێپرسینەوە

لۆگۆی دەستەی باڵای نیشتمانیی لێپرسینەوە و دادپەروەری

دەستەی باڵای نیشتمانیی لێپرسینەوە و دادپەروەری لە عیراق، دەرگای پێشکەشکردنی داواکاری بۆ ئەو هاووڵاتییانە کردەوە کە لە سەردەمی ڕژێمی پێشوودا زیانیان پێگەیشتووە، بە ئامانجی گەڕاندنەوەی مافە یاسایی و داراییەکانیان لەڕێگەی فۆرمی ئەلیکترۆنییەوە.

دەستەکە لە راگەیەندراوێکیدا، داوا لە هاووڵاتییانی شایستە دەکات لەڕێگەی ماڵپەڕی رەسمییەوە فۆرمی داواکاری دابەزێنن،پاشان لەگەڵ پڕکردنەوەی سەرجەم زانیارییەکان، بەڵگەنامە رەسمییەکان هاوپێچی یەکێک لەم ئیمێڵانە بکەن ([email protected]) یان ([email protected])

هەر لە راگەیەندراوەکەیدا، دەستەی باڵای نیشتمانیی لێپرسینەوە و دادپەروەری لە عیراق، داوا لە هاووڵاتیان دەکات لە سەعات 07:00ی بەیانی تا 12:00 نیوەڕۆ لەرێگەی ژمارە تەلەفۆنی (07873931421) بۆ هەر پرسیار و زانیارییەک پەیوەندییان پێوە بکەن.

ئەمەش لەکاتێکدایە، رژێمی پێشووی عیراق چەندین تاوانی دژ بە گەلی کورد ئەنجامداوە، کە خۆی لە ئەنفال و کیمیاباران و وێرانکردنی گوندەکان و چەندین تاوانی دیکە دەبینێتەوە، بۆیە کوردانی زەرەرمەندی دەستی رژێم دەتوانن داوای قەرەبوو بکەنەوە.

PUKMEDIA